Hadees e Deegran

احمد مشتاق  کا شمار اردو کے ان صاحب اسلوب شعراء میں ہوتا ہے جن کے ہاں موجود اثرپذیری نے صرف یہ کہ انھیں پڑھنے والوں کا وسیع حلقہ دیا بلکہ ان کی شاعری کی تخلیقی سطح نے معاصرین اور آنے والوں کو متاثر کرنے کے ساتھ ساتھ ان کی رجحان سازی

Trendsetting

بھی کی ہے۔

یہ بات الگ ہے کہ احمد مشتاق کی واحد شناخت ان کی شاعری ہی نہیں بلکہ ان کی ترجمہ نگاری بھی اسی درجہ اہم ہے۔ انھوں نے مقامی و عالمی ادب سے اپنے مطالعاتی شغف کے پیش نظر انگریزی، فارسی اور پنجابی زبانوں کے اہم شعرا اور فکشن نگاروں کے متعدد شعری و نثری فن پاروں کو اردو میں ترجمہ کرنے کے علاوہ کچھ رجحان ساز مصوروں پر لکھے گئے اہم مضامین کو بھی اردو کا قالب عطا کیا ہے۔ یہ ایک المیہ ہے کہ احمد مشتاق کی اس فکری و تخلیقی جہت کو تاحال کماحقہ توجہ نہیں مل سکی۔

اردو ادب کے سنجیدہ قاری کے لیے نوجوان محقق اور نقاد مشتاق احمد کا پہلا تعارف گزشتہ برس کے اوائل میں سامنے آنے والی ان کی اولین تحقیقی کارگزاری " آدمی ہمارا ( شعریات احمد مشتاق ) " سے ہوا تھا اور زیر نظر کتاب "حدیث دیگراں (احمد مشتاق کے شعری اور نثری تراجم ) " اسی سلسلے کی دوسری کڑی ہے ۔ پہلی بار انھوں نے احمد مشتاق  کی شعریات کے حوالے سے آج تک دی گئی اہم تنقیدی آراؑ  پر مبنی تمام تحریروں کو یکجا کیا تھا جبکہ اس مرتبہ تراجم کی ذیل میں ان کے تمام تر کام کو یکجا کر کے ایک اورتحقیقی خدمت سرانجام دی ہے ۔ ان کی یکے بعد دیگرے آنے والی یہ دونوں کتا میں بلاشبہ اس درجہ کی ہیں کہ اگر انھیں احمد مشاق کے مطالعات کے ضمن میں بنیادگزار بھی قرار دیا جائے تو بے جا نہ ہو گا ۔ یہ کتاب واقعی ایک وقیع اور قابل قدرتحقیقی کاوش ہے اور اردو ادب کے ان قارئین کے لیے نعمت غیر مترقبہ ثابت ہو گی جو عالمی ادب کی خوشہ چینی کے خوگر بھی ہیں۔

Title: Hadees e Deegran -  حدیثِ دیگراں (احمد مشتاق کے شعری اور نثری تراجم)

Compiled by: Mushtaq Ahmad مشتاق احمد

Subject: Poetry, Essays, Translation

ISBN: 9693533461

Year: 2021

Language: Urdu

Number of Pages: 264